‘T MAG GIN NAAM HEM’N

Eem’n op de baank veur de kiekdeuze, eem’n kiekn ho at met de wearld geet, dat is zoa tuschedeur aajt wa weer ‘n groot plezeer. Van de wekke was d’r veur : “Oaln pruttel op ‘n Bödn” of, zoa at zee ‘t neumt : “Antiek op zolder”.

Dat programma steet mie wa an, meer noe hebt zee doar ‘n wicht bie dat verstaand mot hebn van oald grei, of zoa at zee ‘t neumt : nen Antiquair. Dat wicht hef nen veurnaam woar ak veer moal noar luustern mos um ‘t te begriepn. Za’k ‘t oe vertelIn ? le geleuft het nich. “Poekelientje”. Doar zakt oe de bokse toch van of. “Poekeltientje”. Hukfukke leu doot dat heer keend an ? At zee noe geboorn was met nen pökkelke dan kon ik ‘t nog wa begriepen, meer nee, zee was zoa liek as nen slettnpoal.

Het schient dat meer leu de weg kwiet bint bie ‘t gemn van naamn an de keender. D’r is zolms ‘n beukske van oetgomn. “Wie noemt z’n kind nou Chardonnay”, joa de doarigheid zit oaweral. At dat zoa verdan geet, dan hebt de keender zukke naamn da’j nich meer weet of de leu dee at nen naam roopt of zee döst hebt, ‘n hoond roopt of met ‘n brommer votwilt. Möt dat noe ? Vrooger was ‘t aai’jt zoa dat rieke leu, dee van adel, hadn nen heeln koppel veurnaamn. Kiek meer noar van Lippe Biesterfeld, acht veurnaamn en zee neumn ‘m ‘Benni’. Arme leu hadn veur 1800 solms nich moal nen achternaam. Napoleon hef dat deurdrukt en toen mossn ze wa. le wödn ok vaak neumt noar de boerderije woar aj at oet ‘t hoes kwamn of ie kreegn ‘n naam van oen vaar of oen moor en dan met zoon of dochter d’r achter. At zee ‘t helemoal noch meer wussn dan neumn zee ‘t keend “Breur” of “Zus”en doar mus dat keend dan zien leemt met deur. Kreegn ie dan toch nen aandern naam dan zetn zee de naam van vaar of moor en ‘t keend achter mekare : Bats-Gerard, Grada’s-Merie.

Wie hebt noe nen langn tied aweer dat ‘n naam van de keender ‘gewoon’möt wén. Bas, Teun, Daan, Mieke,Joke,Jan. Meer ok dreejt doar völ exotica deurhen; dubbele naamn en zolms dreedubbel :Erik Jan Willem, Chantal Louise Priscilla. Dee oale naams dee heur ie rechtervoort nich meer. Bie Bertha, Beernd, Geziena of Klaziena he’j ok alleen ‘n oald ménske veur de oagn en ginne jonge leu. Oons jong he’k Grolsch neumt : dat is dan veur mie nog meer één zeggn, ak veur de kiekdeuze wat an de lip wil hebb’n …

Oatmöske
Tweedoezendveerteen.

RM