Oons Hermenneke vreug mie laatst bie ’t oamd-ettn :
Vaar, wie hebt op school ‘ Staatkunde’ had en ik begriep d’r nog nich völle van : “ kön ie mie verteln wat poltiek is ?”
“ Now mien jongn, dat za’k oe is duudlijk oet de deuke doon.”
Luuster :
- Ik brenge het geld in hoes, dus ik bin ‘Het Kapitaal’
- Oen moor krig dat in de knip en gef het geld weer oet : dat is ‘De Regering’
- Oons opa hoalt ’t spil in de gaatn : den is ‘De Vakbond’
- Johanna, den hier ok ’t hoesholdn döt is ’t werkvolk, ze’jt meer : ‘De Arbeidersklasse’
- En woar doot wie ’t aalmoal veur, mien jong : veur oe ! Ie bint ‘Het volk’
- Dan he’j nog oons kleen in de weeg, oen breurke ; dat is ‘De Tookomst’
Hermenneke gung s’oams noar ber, kwam am ’t prakkezeern en kon nich sloapn. Hee gung ’t ber oet en gung noar de sloapkamer van de oale leu.
- Doar lag’t moor, helemoal van de wearld, allenig te sloapn.
- Dan meer noar de kamer van Johanna hen, meer den lag met oons Vaar in ber.
- Deur ’t venster zag hee opa nog metkiekn,
- Zien kleene breurke lag in ber te bleern met de bokse volle met driet.
Hee gung toen meer rap weer noar zien eegn ber hen.
S’mons vrog an de toafel, vreug ik an Hermenneke: “en mien jong, he’j noe begreppn wat poltiek is ?”
Joa Vaar, zei ’t kleene klooke keerlke :
- ’t Kapitaal maakt misbroek van de Arbeidersklasse
- ’n Vakbond kik allen meer too
- De Regering den slöp met de oogn dicht,
- Noar ’t Volk wod nich meer luustert
- en oonze Tookomst lig mooi in ’n drek…….
RM. Oatmössche 2018